laosci blog | cereal for brain

ການແນະນຳການປ້ອງກັນພະຍາດໄຂ້ເລືອດອອກ ໂຄງການ 5 ປໍ ຂອງນະຄອນຫລວງ

1. ປ້ອງກັນບໍ່ໃຫ້ຍຸງລາຍກັດ

• ຕ້ອງນອນໃນມຸ້ງບໍ່ວ່າກາງເວັນ ຫລື ກາງຄືນ
• ທາງຢາຫລືສະບູກັນຍຸງ
• ໃຊ້ຢາອູດຍຸງ, ຢາສີດຍຸງ ແລະ ອື່ນໆ

2. ປົກປິດພາຊະນະທີ່ຂັງນ້ຳໃຫ້ດີ ບໍ່ໃຫ້ຍຸງລາຍມາວາງໄຂ່ໄດ້ ຫລື ປ່ອຍປາກິນຫນອນຍຸງ

• ໄຫນ້ຳ, ຟຸ້ຍນ້ຳຕ້ອງມີຝາຫລື ເອົາຜ້າມຸ້ງປິດໃຫ້ດີ ເພື່ອບໍ່ໃຫ້ຍຸງໄຂ່ໃສ່ໄດ້ ຫລື ໃສ່ຢາຂ້າຫນອນຍຸງ

3. ປະຕິບັດການອະນາໄມສິ່ງແວດລ້ອມ ອ້ອມຂ້າງເຮືອນແຕ່ລະເຮືອນ
(ອະນາໄມພາຊະນະຕ່າງໆທີ່ບັນຈຸນ້ຳ)

• ລ້າງ, ຜັດ, ຖູ, ໄຫນ້ຳ, ອ່າງນ້ຳ, ທຸກໆອາທິດ
• ເກັບມ້ຽນ ແລະ ທຳລາຍຖິ້ມພາຊະນະທີ່ມີນ້ຳຄ້າງເຊັ່ນ : ກະໂປະ, ກະປ໋ອງ, ຢາງຕີນລົດເກົ່າ, ແກ້ວແຕກ, ຖ້ວຍແຕກ ແລະ ອື່ນໆ
• ຖາງຫຍ້າ, ຖາງປ່າ, ລະບາຍນ້ຳອັ່ງຫລື ນ້ຳຂັງຢູ່ຕາມບໍລິເວນອ້ອມຂ້າງເຮືອນຂອງທ່ານ

4. ເປີດຂະບວນການອະນາໄມໃນຫມູ່ບ້ານທຸກໆອາທິດ

• ແຕ່ລະຄອບຄົວ, ຫນ່ວຍ ແລະ ບ້ານຕ້ອງເປີດຂະບວນການເຮັດອະນາໄມທຸກໆອາທິດ

5. ເປັນໄຂ້ແກ່ຍາວຕ້ອງໄປພົບແພດຫມໍເພື່ອປີ່ນປົວ

• ເມື່ອລູກຫລານ ຫລື ຕົວທ່ານເອງເປັນໄຂ້ຕ້ອງໄປໂຮງຫມໍເພື່ອກວດກາປີ່ນປົວຕາມຫລັກການ
• ຫ້າມຊື້ຢາມາປີ່ນປົວດ້ວຍຕົນເອງ (ໂດຍສະເພາະແມ່ນ ຢາແກ້ໄຂ້ອັສເປຣີນ)
• ຖ້າມີໄຂ້ເລືອດອອກເກີດຂຶ້ນຫລາຍ ຫລື ມີການລະບາດຢູ່ໃນຄຸ້ມບ້ານຂອງທ່ານ ໃຫ້ແຈ້ງທີ່ຫ້ອງການສາທາລະນະສຸກເມືອງຂອງທ່ານ ຫລື ສະຖານີໄຂ້ຍຸງ, ຫນ່ວຍງານລະຍາດພະແນກສາທາລະນະສຸກ ນະຄອນຫລວງຕາມເບີໂທຂ້າງລຸ່ມນີ້

ສາຍດ່ວນ :
020 5506352 (ທຸກເວລາ)
021 212610, 021 215228, 021 212613 (ໃນໂມງລັດຖະການ)
ເປັນຄວາມຫ່ວງໃຍຈາກພະແນກສາທາລະນະສຸກນະຄອນຫລວງ

10 ຂໍ້ເທັດຈິງ(ຕິເບາະ)ຂອງການສືກສາລາວ

1. ເມື່ອມີສຽງລົມກັນຈົນ ເຖິງຂັ້ນວົນແຊວ ຜູ້ໂຊກຮ້າຍທີ່ຮັບເຄາະມັກ ຈະເປັນແຖວຫລັງສະເຫມີ ເຖິງວ່າຄວາມຈິງຈະແຊວກັນ ທັງຫມົດຫ້ອງກໍຕາມ.
2. ຖ້າເປັນຜູ້ຊາຍທີ່ໄປຖາມເລື່ອງບົດຮຽນ ມັກຈະບໍ່ໄດ້ຮັບຄວາມສົນໃຈ ຈາກອາຈານຜູ້ຊາຍດ້ວຍກັນພໍປານໃດ ແຕ່ຖ້າເປັນນັກຮຽນຍິງໄປຖາມ…ຄິດຕໍ່ເອງລະກັນ.
3. ເວລາມີກວດກາຫລືສອບເສັງ ນັກຮຽນສ່ວນໃຫຍ່ ມີຄວາມຕ້ອງການຢາກຈະນັ່ງໃກ້ໆ ກັບຜູ້ທີ່ຈັດໄດ້ວ່າຮຽນເກັ່ງ ເຖິງຈະຮູ້ລ່ວງຫນ້າວ່າ ອາດຈະບໍ່ໄດ້ກ່າຍກໍຕາມ.
4. ຮູບແບບການຕອບຂໍ້ສອບ ຂອງນັກຮຽນລາວ ທີ່ໄດ້ຮັບຄວາມນິຍົມສູງສຸດໃນປະເທດກໍຄື “ຕອບຕາມຄວາມເຂົ້າໃຈ”
5. ບົດສະຫລຸບຜົນການຮ່ຳຮຽນປະຈຳອາທິດຂ ອງສິບເວນ ຂໍ້ເສຍທີ່ພົບປະຈຳມັກຈະເປັນ “ສ່ວນໃຫຍ່ຍັງວົນແຊວໃນຫ້ອງ ແລະ ອີກຈຳນວນຫນື່ງຍັງຜີດລະບຽບ” ໂດຍທີ່ບໍ່ມີອາທິດໃດເລີຍ ທີ່ບໍ່ມີຂໍ້ເສຍຕົວນີ້ ແລະ ກໍເປັນແບບນີ້ຕະຫລອດທັງປີ.
6. ລາງວັນນັກຮຽນເກັ່ງປະຈຳແຕ່ລະເດືອນ ແມ່ນສຳລັບຜູ້ທີ່ເສັງໄດ້ຄະແນນ 7 ຂຶ້ນໄປທຸກວິຊາ ຫມາຍຄວາມວ່າຕ່ຳສຸດຄື 7 ທຸກວິຊາ ເຊິ່ງວ່າຜູ້ທີ່ໄດ້ຄະແນນ 10 ຫມົດ ຍົກເວັ້ນວິຊາດຽວທີ່ໄດ້ 6 ຈະບໍ່ມີສິດໄດ້ລາງວັນນິ້.
7. ນັກຮຽນເກັ່ງມັກຈະມີສະເຫນ່ສຸດໆ ຄືຊ່ວງໃກ້ຈະເສັງ ໂດຍສະເພາະແມ່ນເສັງພາກຮຽນ ແຕ່ພໍການສອບເສັງຈົບລົງ ກໍ..ຖືກແນມວ່າເປັນເດັກເນີດເຊັ່ນເຄີຍ.
8. ວິຊາສ່ວນໃຫຍ່ໃນລະດັບປະຖົມ ແລະ ມັດທະຍົມຕອນຕົ້ນ ຫລືກະທັ້ງຕອນປາຍ ຍັງມີການອ່ານໃຫ້ຈົດ ທັ້ງໆທີ່ມີປື້ມແບບຮຽນໃຫ້ຊື້ມາອ່ານ ແລະ ຍິ່ງໄປກວ່ານັ້ນ ອັນທີ່ອ່ານໃຫ້ຈົດ ບໍ່ໄດ້ແຕກຕ່າງແມ້ແຕ່ອັກຂະຫລະດຽວ ກັບປຶ້ມອີກຕ່າງຫາກ.
9. ອາຈານມັກຈະເອົາບັດເຊີນຜູ້ປົກຄອງ ໃນກໍລະນີຕ່າງໆເຊັ່ນ : ຂາດຮຽນເກີນ, ຂາດເສັງ, ຄະແນນຄຸນສົມບັດໃກ້ຫມົດ ເປັນຕົ້ນ ໃຫ້ກັບຕົວນັກສຶກສາເອງ ທັ້ງໆທີ່ຮູ້ວ່າບັດນັ້ນ ຈະໄປບໍ່ຮອດມືຜູ້ປົກຄອງຢ່າງແນ່ນອນ.
10. ວິຊາທີ່ນັກຮຽນມັດທະຍົມບໍ່ມັກທີ່ສຸດຄືວິຊາ ຄະນິດສາດ, ຟີຊິກສາດ, ເຄມີສາດ, ຊິວະສາດ, ປະຫວັດສາດ, ພູມສາດ, ສືກສາພົນລະເມືອງ, ພາລະສືກສາ, ພາສາຕ່າງປະເທດ ແລະ ພາສາລາວ-ວັນນະຄະດີ !